WEE MAGGY MACLEAN.

Now, Marion, be kind to wee Maggy Maclean,
When her faither an’ mither are baith dead an’ gane;
Aye mind she’s an orphan, a friendless bit wean,
An’, Marion, be kind to wee Maggy Maclean.
When gaun to your sport an’ your play wi’ the lave,
Tak tent that wee Maggy ahint ye ne’er leave;
Gif ither bairns tout her then bid them refrain,
For nae wean’s sae kind as wee Maggy Maclean.
When ye in your pocket hae aught that is rare,
Be ready the first o’t wi’ Maggy to share;
An’ mind when ye’re getting’ bawbees o’ ye’r ain’
There’s nae faither to toil for wee Maggy Maclean.
An’ gif ye be friendly in schule an’ at play,
Ye’ll baith get yer hansel at auld New-year’s Day;
An’ twa-three bawbees ilka Saturday e’en,
I’ll aye gie my May and wee Maggy Maclean.
Now, Marion, be kind to wee Maggy Maclean,
When her faither an’ mither are baith dead an’ gane;
Aye mind she’s an orphan, a friendless bit wean,
An’, Marion, be kind to wee Maggy Maclean.

Robert Sanderson (1836 – 1902)

Back